Guvernatori i Bankës Qendrore të Republikës së Kosovës, Ahmet Ismaili së bashku me zëvendësguvernatorin, Dardan Fusha zhvilloi takim virtual me anëtarin e Bordit Ekzekutiv të Bankës Qendrore Evropiane, Piero Cipollone, në vazhdimësi të takimit të fundit në selinë e Bankës Qendrore Evropiane (BQE) në Frankfurt.
Temë e këtij diskutimi, sipas njoftimit të BQK-së, ishte shqyrtimi i opsioneve dhe mundësitë e bashkëpunimit në fushën e sistemit të pagesave, me theks të veçantë mënyrën e anëtarësimit të vendit tonë në skemën e pagesave SEPA dhe sistemin e pagesave të shpejta TIPS, projekt që mbështetet edhe nga BQE-ja si pjesë e Procesit të Berlinit për gjashtë vendet e Ballkanit Perëndimor.
Po ashtu, është diskutuar edhe për rëndësinë që ka avancimi i infrastrukturës teknike dhe kornizës rregullative, për qasje në sistemin e pagesave të Bashkimit Evropian, ku BQK-ja ka bërë përgatitje dhe ka si objektiv strategjik anëtarësimin, me përfitime shumë të mëdha si për qytetarët, bizneset, mërgatën dhe gjithë ekonominë.
“Pjesë e diskutimit ishte edhe bashkëpunimi i mundshëm ndërmjet BQK-së dhe BQE-së në fushën e menaxhimit të rezervave, mbikëqyrjes së bankave sistemike, si dhe çështje që lidhen me ngritjen e kapaciteteve dhe shkëmbimin e përvojave brenda mandatit të BQE-së dhe BQK-së”, thuhet në njoftim.
Në fund të takimit palët u dakorduan për intensifikimin e takimeve me propozime konkrete dhe bashkëpunimit në arritjen e qëllimeve të përbashkëta të dy institucioneve.
Kontributi i Cipollones mbetet i rëndësishëm, si një mbështes i këtij procesi, i cili para se të emërohej në këtë pozicion ekzekutiv në BQE ka qenë zëvendësguvernator i Bankës Qendrore të Italisë, duke zëvendësuar kështu Fabio Panetta, i cili tashmë është Guvernator i Bankës së Italisë (Banca d’Italia).
