Përfaqësuesi i Lartë i BE-së, Josep Borrell, në Austri ka takuar ministrat e Jashtëm të Ballkanit Perëndimor, përfshirë edhe kryediplomaten kosovare, Donika Gërvalla. Ai ka theksuar se me ta ka diskutuar për një Evropë më të bashkuar, ndërsa ka falënderuar ministrin e jashtëm austriak, Alexander Schallenberg, që i mblodhi.
“Gëzohem që takohem me Ministrat e Jashtëm të Ballkanit Perëndimor, grupin “Miqtë e Ballkanit Perëndimor” dhe “Strategjinë e Rajonit të Danubit”. Ne diskutuam se si të ndërtojmë një Europë më të unifikuar së bashku. Faleminderit Schallenberg që na mblodhe këto ditë në Austri”, ka shkruar Borrell.
Një ditë më parë, ministrja e Jashtme e Kosovës, Donika Gërvalla, ka thënë se në takimin që do ta mbajnë të premten në Vjenë do të paraqesë qëndrimet rreth sigurisë në Evropë dhe rajon e se do të avokojë për përshpejtimin e procesit të anëtarësimit në BE.
“Në takimin e nesërm do të paraqesë qëndrimet e Republikës së Kosovës rreth sigurisë në Evropë dhe në rajon, reformat e thella të ndërmarra për sundim të ligjit, ngritjen e nivelit të demokracisë dhe zhvillimin ekonomik, si dhe do të avokojmë për përshpejtimin e procesit të anëtarësimit në Bashkimin Evropian si dhe nevojës së ndërmarrjes së veprimeve konkrete për ruajtjen e paqes dhe stabilitetit në Ballkanin Perëndimor”, ka shkruar ajo.
