Sekretari amerikan i Shtetit, Antony Blinken në letrën drejtuar presidentit të Serbisë, Aleksandër Vuçiq me rastin e Ditës së Shtetësisë së Serbisë, ka thënë se SHBA-të besojnë në marrëveshjen Kosovë-Serbi në bazë të planit të njohur si franko-gjerman.
“Kam besim se normalizimi i marrëdhënieve ndërmjet Serbisë dhe Kosovës do të sjellë siguri dhe prosperitet për Serbinë dhe të gjithë qytetarët e Ballkanit Perëndimor”, tha Blinken, në letrën drejtuar Vuçiqit, e cila është publikuar nga Departamenti i Shtetit.
Ai tutje theksoi liderët serbë dhe kosovarë do të bëjnë “kompromise të vështira për të arritur marrëveshjen, por sipas tij “shpërblimet për popullin serb – dhe gjithë rajonin – do të jenë të mëdha”.
Në letrën e tij, Blinkeni ka thënë se SHBA-ja e vlerëson partneritetin strategjik me Serbinë dhe e mbështet integrimin e saj në Bashkimin Evropian.
“SHBA-ja është mbështetëse e fuqishme në ambiciet e Serbisë për në Bashkimin Evropian. Jemi të përkushtuar të punojmë me ju dhe partnerët tanë të BE-së drejt këtij qëllimi të rëndësishëm. Mirëprita angazhimin konstruktiv të Serbisë me zyrtarët e SHBA-së, BE-së, Francës, Gjermanisë dhe Italisë në vizitën e fundit në Beograd”, ka shkruar sekretari amerikan i Shtetit.
Blinken po ashtu i bëri thirrje Serbisë të mbështesë Ukrainën, teksa mirëpriti mesazhet mbështetëse të autoriteteve të Serbisë, për vendin e shkatërruar nga lufta, të shprehura në Kombet e Bashkuara.
