Presidenti amerikan, Joe Biden, ka dënuar sulmin e rëndë rus në qytetet ukrainase, përfshirë një spital të fëmijëve në Kiev, në të cilin u vranë të paktën 41 civilë. Ai u zotua se do ta forcojë mbrojtjen ajrore të Kievit.
Të paktën 166 veta u plagosën të hënën në të gjithë Ukrainën, duke përfshirë disa në një spital të fëmijëve në kryeqytetin Kiev.
Reagimi i presidentit Biden vjen kur ai po përgatitet për Samitin e NATO-s në Uashington që nis sot.
Udhëheqësit e 32 shteteve anëtare të NATO-s, vendet e tyre partnere dhe BE-ja, janë mbledhur në Uashington për ta shënuar 75-vjetorin e bllokut.
Samiti do të fokusohet në mbrojtjen dhe parandalimin në kontekstin e pushtimit rus të Ukrainës.
Presidenti Biden ka paralajmëruar se “do të shpallen masa të reja për ta forcuar mbrojtjen ajrore të Ukrainës për të ndihmuar në mbrojtjen e qyteteve dhe civilëve të tyre nga sulmet ruse.
Edhe Këshilli i Sigurimit i OKB-së do të takohet të martën me kërkesë të Ukrainës.
Sekretari i përgjithshëm i OKB-së, Antonio Guterres, iu bashkua zyrtarëve perëndimorë dhe dënoi sulmin raketor të Rusisë në Ukrainë.
Kryetari i bashkisë së Kievit, Vitali Klitschko, shpalli 9 korrikun ditë zie pas sulmeve vdekjeprurëse në kryeqytet.
