Kryeministri shqiptar, Edi Rama ka deklaruar se e ka dorëzuar një draft të Asociacionit të komunave me shumicë serbe te presidenti francez Emmanuel Macron, dhe kancelari gjerman, Olaf Scholz.
Për këtë dokument, ai ka thënë se i ka vënë në dijeni edhe presidentin e Këshillit Evropian dhe amerikanët.
Ai tha se ky draft është punuar nga niveli më i lartë amerikan dhe evropian, gjë që është bërë në rast se do të vinte kjo ditë.
Të enjten në një konferencë të jashtëzakonshme për media lidhur me tensionet në veri të Kosovës, Rama beson se krijimi i Asociacionit është çelësi për të hapur derën e afirmimit ndërkombëtar të Republikës së Kosovës dhe njohjes së saj, uljes së saj në OKB, në të gjitha forumet ndërkombëtare dhe njohjes së ndërsjellët.
Por ndaj kësaj iniciative ka pasur reagime të shumta jo vetëm në Kosovë, por edhe në Shqipëri, Ish-kryeministri Sali Berisha, duke komentuar deklaratën e Ramës, tha ky është një akt i shëmtuar që e tensionon akoma më shumë situatën.
Sipas Berishës, teksti i këtij dokumenti është shkruar në Beograd, ndërsa u shpreh se Rama kërkon të zgjidhë çështjen që ka me McGonigal.
“Argati i Vuçiçit, në detyrim ekstrem, shpalosi veten si një vasal i shpifur i doktrinarit dhe njërit prej autorëve të gjenocidit serb në Bosnje dhe Kosovë, njeriut që me politikën e tij etno-nacionaliste, politikën e tij të Serbisë së Madhe, është faktor destabilizimi kryesor në Ballkan, dhe pas Putinit të Madh edhe në Evropë, Aleksandër Vuçiq”, tha Berisha.
Sipas tij, Edi Rama me detyrim doli dhe informoi shqiptarët se ka hartuar dhe dorëzuar tekstin e marrëveshjes së Asociacionit të komunave me shumicë serbe në Kosovë.
“Natyrisht vetëkuptohet se teksti është shkruar në Beograd dhe pastaj rishkruar në Tiranë”
Duke u bërë thirrje autoriteteve të Kosovës, që në procesin e shtensionimit të situatës, të procedojnë në bashkëpunim me KFOR, BE-në dhe SHBA, duke zbatuar atë plan për të cilën insiston komuniteti ndërkombëtar.
“Për sa i përket Asociacionit, e kam mbështetur dhe do e mbështes si një derivat themelor i lirisë. Por theksoj se Asociacioni nuk mund të jetë kurrë jashtë prerogativave kushtetuese të Republikës së Kosovës”.
Ndërkohë, ish presidenti Ilir Meta, tani kryetar i Partisë së Lirisë, deklaroi se situata e krijuar në mes të Serbisë dhe Kosovës, mund të ndihmohet nga Shqipëria vetëm përmes komunikimit të drejtpërdrejtë e konstruktiv me institucionet e Kosovës dhe kryeministrin Kurti.
“Nuk ka nevojë për ndërhyrje të njëanshme dhe jo transparente, të cilat acarojnë apo përkeqësojnë situatën, e cila paraqitet delikate”, tha Meta, duke shtuar se qeveria shqiptare në asnjë rast nuk duhet të flasë apo të propozojë politika që duhen zbatuar brenda në Kosovë, pa u konsultuar paraprakisht me Kryeministrin dhe institucionet legjitime në Kosovë.
“Asociacioni i Komunave është një marrëveshje tashmë e pranuar nga qeveria aktuale e Kosovës, dhe ajo garantohet në Marrëveshjen e Brukselit dhe në Aneksin e Marrëveshjes së Ohrit, të realizuara me mbështetjen dhe negocimin e Bashkimit Evropian dhe Shteteve të Bashkuara të Amerikës”, deklaroi Meta, duke shtuar se zgjidhja se si do të arrihet Asociacioni, gjendet pra tek respektimi i Marrëveshjes së Brukselit dhe Ohrit.
