Kanë vazhduar raportimet e qytetarëve pasi në protestën e 15 marsit, një zhurmë e fortë shkaktoi panik e çorientim. Nga Ministria e Punëve të Brendshme e kanë pranuar se policia ka një pajisje të ngjashme, por thonë se nuk e përdorën në ditën e protestave.
Gjatë protestës më 15 mars në Beograd u dëgjua një zhurmë e fortë që shkaktoi panik dhe çorientim. Shumë qytetarë raportuan simptoma si dhimbje në veshë dhe të përziera, duke shtuar dyshimet për përdorimin e topit zanor. Ministri i Brendshëm Ivica Daçiq pranoi se policia posedon pajisje të ngjashme, por mohoi përdorimin e tyre. Policia pretendon se bëhet fjalë për altoparlantë për informimin e qytetarëve, ndërsa opozita e cilëson këtë si provë për topin zanor.
“Kjo nuk është çështje politike, por e jetës, mbijetesës dhe e lirisë. Terrori që po përjetojmë, po ndodh këtu dhe tani. Regjimi përdor kriminelë, armë zanore, kërcënime dhe frikësim për ta mbajtur pushtetin. Për këtë kemi prova të qarta?, tha Gjillas duke theksuar se partia e tij e ka paditur presidentin e Serbisë Aleksandar Vuçiq dhe partin e tij për terrorizëm”, tha Dragan Gjillas, nga Partia e Lirisë dhe Drejtësisë .
Autoritetet mohojnë dhe qeveria ka bërë të ditur se ka ftuar FBI-në dhe FSB-në ruse ta bëjnë një hetim të pavarur. Një pjesëtar i Xhandarmërisë ka konfirmuar për portalin Danas se gjatë protestës ishin vendosur disa topa zanorë, por nuk di nëse janë aktivizuar. Ekspertët besojnë se bëhet fjalë për modelin të fuqishme për kontrollin e turmave.
“Tashmë është e qartë se topat zanor nuk janë vetëm pjesë e pajisjeve të MPB-së diku në depo, siç pretendon ministri Daçiq, por janë montuar në automjete. Këto janë pajisje me fuqi të lartë dhe vetë prania e tyre dëshmon se autoritetet kanë gënjyer. Pra, ata kanë pasur top zanor, dhe kjo ngre mundësinë që ai të jetë përdorur”, tha Alleksandar Radiq, analist ushtarak .
Ndërkohë që publiku kërkon përgjigje, presidenti Vuçiq deklaroi se nëse provohet përdorimi i topit zanor, ai nuk do të jetë më president.
