F.B.
Real Madridi ka startuar me fitore në La Liga duke e mposhtur Athletic Bilbaon si mysafirë në derbin e xhiros së parë të La Ligass. Rodrygo (28’) dhe Jude Bellingham (37’) shënuan golat për Real Madridin
Real Madridi e ka nisur sezonin e ri me një fitore të pastër kundër Athletic Bilbao në San Mames, për t’i fituar pikët e para në këtë sezon.
Lojtar i ndeshjes, pa dyshim ishte Jude Bellingham i cili bëri një debutim fantastik në fanellën e Los Blancos.
Real Madridi ishte një skuadër shumë më e mirë në pjesën e parë ku sulmoi vazhdimisht.
Goli për mysafirët erdhi në minutën e 28-të, ku Rodrygo shfrytëzoi për mrekulli hutinë në mbrojtjen e Bilbaos për të shënuar gol për rezultat 0-1.
Real Madridi insistonte për golin e dytë dhe ai do të vinte nga blerja 100 milionëshe e këtij sezoni e Los Blancos.
Jude Bellingham tregoi klasin e tij për të shënuar një gol me parabolë në minutën e 37-të te ndeshjes, që doli të jetë edhe goli i fundit në këtë ndeshje.
Në pjesën e dytë Athletic Bilbao ishin më kërkues dhe ishin afër për të shënuar disa herë.
Fede Valverde (68’) dhe Vinicius Junior (70) ishin afër për të shënuar gola për Realin derisa Imanol Garcia de Albeniz (72’) pati rastin më të mirë për Bilbaon për ta ngushtuar epërsinë.
Rastin e fundit në këtë ndeshje e pati Luka Modric në minutën e 84-të por goditjen e tij e priti Unai Simon.
Kështu, Real Madridi fiton pikët e para këtë sezon duke e nisur me këmbë të mbarë derisa në javën tjetër ata përsëri do të luajnë mysafirë, ku do të përballen me Almerian. Në anën tjetër, Bilbao do të jetë mysafirë i skuadrës së Osasunas.
