Bashkimi Europian ka thënë se situata në veri të Kosovës edhe pas heqjes së barrikadave vazhdon të jetë e brishtë.
Zëdhënësja e BE-së, Nabila Massrali, tha se presin që palët të përmbahen nga veprimet që mund të kthejnë situatën e njëjtë.
“Ne i mirëpresim de-përshkallëzimin e situatës dhe largimin e barrikadave në veri të Kosovës. BE-ja ka luajtur një rol aktiv në arritjen e saj, në koordinim të ngushtë me SHBA-në dhe KFOR-in. Situata mbetet shumë e brishtë. Në presim nga palët e interesuara që të vetëpërmbahen dhe të shmangin veprimet që kanë potencialin e kthimit të eskalimit dhe dhunës. EULEX vazhdon të monitorojë situatën. Zhvillimet e javëve të fundit tregojnë se sa e rëndësishme është që të bëhet përparim në normalizimin e marrëdhënieve midis Kosovës dhe Serbisë, bazuar në propozimin e BE-së”.
Ajo ka thënë se duhet të zbatohen marrëveshjet e deritanishme dhe se duhet të fillohet me bisedimet për themelimin e Asociacionit.
“Kjo gjithashtu nënkupton zbatim të plotë të marrëveshjeve ekzistuese pa vonesë, duke filluar me kthimin e serbëve në institucione dhe fillimin e diskutimeve për Asociacionin e komunave me shumicë serbe”.
