Tre tifozë prizrenas po mbahen në mbajtje për 48 orë nga policia me urdhër te prokurorit, nën dyshimin se të njëjtit ishin futur në fushën e futbollit ku dje luajtën Liria dhe Vëllaznimi dhe kryen vepra huliganizmi duke i sulmuar mysafirët nga Gjakova.
Gent Gjini, avokat i njërit prej tifozëve të arrestuar, në një deklaratë, fajtor e bën KF Vëllaznimin për provokim dhe eskalim të dhunës.
Ai po kërkon nga prokuroria ta hetojë thellësisht rastin se si erdhi deri te eskalimi i dhunës dhe të mos bëjë veprime të njëanshme.
“Në cilësi të avokatit të Dashmir Dakaj, tifoz i FC Lirisë lidhur me ngjarjen e fundit për ndeshjen e zhvilluar ndërmjet klubit FC Liria dhe KF Vlëllaznimi, bëj reagimin lidhur me incidentin e eskalimit të dhunës në stadium të tifozëve të FC Liria, ku nga gjithë ngjarja e zhvilluar përkundër faktit se i mbrojturi im është arrestuar, dhe gjendet nën masën e ndalimit prej 48 orëve me urdhër te prokurorit, për dyshimin e kryerjes se veprës penale të sulmit ndaj lojtarëve të KF Vëllaznimi, dhe menaxhmentit të këtij klubi, uns si avokat konsideroj se duhet kuptuar shkakun dhe pasojat, se si ka ardhur deri te eskalimi i dhunës, përkatësisht nga kush është provokuar kjo situatë dhe se me këtë prokuroria, organet e ndjekjes, dhe gjykata si dhe vet Federata e Futbollit të Kosovës, duhet të bëjnë hetim të thellë profesional dhe objektiv që personat përgjegjës të marrin dënim meritor dhe të mos amnestohet askush, por që paraprakisht duhet ditur zanafillën e problemit dhe akterët se kush janë ata”, thotë avokati Gjini.
“Për neve është e papranuar provokimi, dhe linqimi zyrtar i KF Vëllaznimi, me përdorimin e fjalëve dhe gjuhës denigruese e të quajturit kriminel të të gjithë tifozëve të FC Lirisë, e po aq sa kjo është edhe situatë shumë e dyshimtë që duhet që të hetohet, se si KF Vëllaznimi, ka paralajmëruar se ndeshja mund të kalojë në eskalim të mundshëm, dhe për këtë ka kërkuar ndihmën e policisë dhe Federatës së Kosovës”, thekson ai.
“Pra kjo situatë për mua si avokat është diçka shumë shqetëuese, për ta kuptuar se mos vallë kjo situatë ka qenë e parapërgatitur nga një skenar i KF Vëllaznimit, që të bien në pre tifozët e FC Lirisë, andaj konsideroj se prokuroria duhet të bëj hetim të panashëm, dhe të thellë dhe të hetojë të 2 palët në këtë çështje, e mos të veprohet me standarde të dyfishta, e kur në ndeshjen mysafire që ka luajtur FC Liria me KF Vëllaznimin, tifozët e FC Lirisë janë sulmuar dhe provokuar nga KF Vëllaznimi e ndërsa reagime nga federata, nuk ka pasur aq sa edhe organeve të ndjekjes per të i parandaluar këto dukuri”, u shpreh ai.
