F.B.
Kombëtarja e Shqipërisë regjistroi fitoren e parë në kualifikimet për Kampionatin Evropian “Euro 2024”.
Ndeshja e zhvilluar në stadiumin “Air Albania” përfundoi me rezultatin 2:0.
Jasir Asani (52’) dhe Nedim Bajrami (76’) shënuan golat e fitores për Kombëtaren shqiptare.
Për Asanin ishte ky goli i tij i parë me “Kuqezinjtë”, në vetëm ndeshjen e tij të dytë zyrtare.
Pas ndeshjes, futbollisti nga Shkupi u shpreh i lumtur për golin – teksa tha se nuk do të e harrojë asnjëherë këtë natë.
“Të gjithëve u kisha thënë se do ta shënoj shumë shpejt golin. Shënova super-gol dhe jam shumë i lumtur. Dua të vazhdoj kështu”, tha fillimisht Asani.
“Unë kam pasur shumë dëshirë të madhe të luajë për Shqipërinë dhe jam më i lumturi në botë që ia arrita. Nuk do ta harroj këtë ndeshje, me stadiumin plot dhe me një gol. Shpresoj t’i kemi gjithmonë me vete tifozët, pasi kemi vërtetë nevojë për ta”, shtoi anëtari i Gwangju.
28-vjeçari foli edhe për përzgjedhësin Sylvinhon, nga i cili e mori për herë të parë ftesën për të luajtur me Shqipërinë.
“Që ditën e parë që e kam takuar, ai më ka dhënë mbështetje shumë të madhe, jo vetëm mua por të gjithë lojtarëve. Megjithatë nuk kemi bërë asgjë, pasi na pret një punë shumë e madhe përpara. Falënderoj Sylvinhon për ftesën, pasi më dha mundësinë të tregoj cilësitë e mia”, deklaroi Jasir Asani.
