Policia e rajonit të Prishtinës, në kuadër të punës së saj për parandalimin e veprimtarive kriminale që po i sjellin dëme shoqërisë, ka intensifikuar veprimet e saja në drejtim të identifikimit dhe kapjes së personave të dyshuar të përfshirë në aktivitet kriminal.
Përmes një njoftimi për medie bëhet e ditur se dje, në rrugën “Haxhi Kleçka” në Lipjan, policia duke u mbështetur në informacione të marra në rrugë operative, ka kryer kontrollin e një apartament, me ç’ rast ka arrestuar tre persona, si dhe ka gjetur dhe sekuestruar: Një revole të tipit ‘Zastava’ të kalibrit 6mm, një thikë, si dhe një sasi të substancës narkotike që dyshohet të jetë e llojit kanabis (marihuana).
“Ndaj të dyshuarve: B. H, mashkull, 30 vjeç, shtetas i Kosovës, si dhe M. B, mashkull, 29 vjeç, shtetas i Kosovës, H. H, mashkull, 27 vjeç, shtetas i Republikës së Kosovës, me rekomandimin e prokurorit të shtetit është iniciuar hetim në drejtim të veprave penale “Mbajtje në pronësi kontroll ose posedim të pa autorizuar të armës” si dhe “Blerja, posedimi, shpërndarja dhe shitja e paautorizuar e substancave narkotike, psikotrope ose analoge”, dhe të njëjtit janë dërguar në mbajtje prej 48 orësh”, thuhet në njoftim.
