Zëvendësministri i Punëve të Jashtme dhe Diasporës, Kreshnik Ahmeti, ka numëruar disa nga të arriturat e MPJD-së gjatë vitit 2023.
Në një postim në Facebook, Ahmeti ka deklaruar se viti 2023 ka qenë mjaft dinamik sa i përket politikës së jashtme, ku edhe kanë përfunduar me sukses disa procese të anëtarësimit, e po ashtu ai ka përmendur edhe liberalizimin e vizave.
“Përfundimi i suksesshëm i procesit të liberalizimit të vizave; Votimi i suksesshëm në procesin e anëtarësimit në Këshillin e Evropës; Anëtarësimi në ICMP; Anëtarësimi në OGP; Anëtarësimi në IIAS; Anëtarësimi në EYCA”, ka thënë ai.
Ai gjithashtu ka përmendur edhe hapjen e misionit të parë në Poloni.
“Kthimi i marrëdhënieve me Palaun; Rreth 20 konsultime politike me shtete të tjera”, vijon postimi i tij në Facebook.
Ahmeti tutje ka theksuar se kanë arritur edhe mbi 100 marrëveshje dypalëshe me shtete të tjera.
