Shefi i Grupit Parlamentar të AAK-së, Besnik Tahiri, ka thënë se kanë kërkuar debat parlamentar për qeverisjen dyvjeçare të Kurtit, ku do të trajtohen 10 pika.
“AAK-ja ka kërkuar një debat parlamentar për punën e Qeverisë për këto dy vjet. E shohim shumë të rëndësishme që Kuvendi që me një rezolutë të merret me 10 pika që i kemi propozuar”.
“Ekonomia dhe punësimi kanë qenë zero. Një plagë që po i kthehet Kosovës është ikja. E treta lidhet me administratën e shtetit. Çështja tjetër lidhet me pagën minimale në sektorin privat. Çështja tjetër lidhet me sigurinë. Ushtarët në FSK janë duke e lëshuar atë dhe aplikimi është duke rënë. Çështja tjetër që lidhet është me energjinë. Qe dy vjet nuk ka asnjë veprim për energjinë. Janë edhe tri tema, për shëndetësinë, çështja tjetër lidhet me arsimin. Dhe e fundit në temën sektoriale janë skemat sociale. Dhe e fundit lidhet me dialogun, me marrëveshjen. Marrëveshja nuk guxon që të zhagitet, nuk bën që të vonohet”, tha ai, raporton EO-ja.
Ai sa i përket takimit të 27 shkurtit ndërmjet Kosovës dhe Serbisë tha se si opozitë nuk kanë asnjë informacion se çka do të diskutohet. Ai po ashtu kritikoi agjendën legjislative të kësaj qeverie, ku tha se është një agjendë e dështuar.
“Ne nuk kemi asnjë informacion për këtë takim, nuk dimë se për çka po ndodh ky takim. Marrëveshja duhet që të ndodhë sa më shpejt. Marrëveshja është finale, marrëveshja është kontraktuale dhe i hap rrugë që shtetet që se kanë njohur ta njohin Kosovën”.
“Agjenda legjislative është letërnjoftimi i një qeverie. Ligjet që e prekin qytetarin ende nuk kanë ardhur. Ne e dimë që ligji i pagave e ka deformuar. Nuk kemi dorë në agjendën legjislative, është në dorën e Qeverisë. Opozita në këtë çështje është e kufizuar. Agjenda legjislative e vitit të kaluar është agjendë e dështuar”, tha ai.
