Xhandarët e Njësisë Policore të Specializuar Rezervë të EULEX-it u nderuan të enjten me Medaljen e Shërbimit në CSDP në prani të Ministrit të Punëve të Brendshme të Kosovës dhe shefave të misioneve të shteteve anëtare të BE-së.
Sipas njoftimit për medie lëshuar nga EULEX, 24 xhandarë italianë dhe 10 lituanezë të Njësisë Policore të Specializuar Rezervë (NJPS) të EULEX-it morën medaljen për shërbim në Politikën e Përbashkët të Sigurisë dhe Mbrojtjes (CSDP), e cila jepet nga Përfaqësuesi i Lartë i BE-së të gjithë grave dhe burrave të merituar që shërbejnë në misione të ndryshme të CSDP-së në mbarë botën.
Ceremonia për ndarjen e medaljeve për shërbim u organizua nga shefi i misionit EULEX, Lars-Gunnar Wigemark në selinë e këtij misioni në Prishtinë, në prani të ministrit të Punëve të Brendshme të Kosovës, Xhelal Sveçla dhe shefave të misioneve të shteteve anëtare të BE-së, të KFOR-it e të Policisë së Kosovës.
Në fjalimin e tij kryesor, shefi i EULEX-it i falënderoi Italinë dhe Lituaninë për ofrimin e disa prej policëve më të mirë për këtë zbarkim.
“Prania e tyre sot këtu demonstron gatishmërinë tuaj për ta mbështetur sigurinë dhe stabilitetin në Kosovë dhe në Ballkanin Perëndimor në tërësi”, tha Wigemark.
“Do të gaboja sikur të mos e falënderoja Poloninë për kontributin e saj të përhershëm në Njësinë e Policore të Specializuar të EULEX-it. Kontigjenti nga Polonia që shërben për shumë vite në Kosovë është një kujtesë e përditshme e përkushtimit të vendit tuaj për sigurinë në Kosovë dhe në rajonin e gjerë”, deklaroi ai.
