Ferizaj do të përballet në udhëtim me Llapin në kuadër të xhiros së 33-të në Albi Mall Superligë.
Dy skuadrat këtë edicion janë përballur tre herë dhe në të tri rastet kanë qenë të besuarit e trajnerit Panadic që kanë fituar.
Ferizaj ka triumfuar dy herë në shtëpinë e tyre dhe një herë në Podujevë me rezultat të njëjtë në të tri sfidat 2-1.
Duke marrë parasysh rëndësinë e pikëve, Ferizaj ka udhëtuar drejt Podujevës për fitoren e katërt ndaj Llapit, ku me tre pikë do t’i shtonte shumë gjasat për mbijetesë.
Gjithnjë sipas burimeve të Olles, futbollistët ferizajas kanë 20 mijë euro premio për fitoren në Podujevë.
Kjo është një shumë e jashtëzakonshme për një ndeshje dhe tani pritet të shihet në fushë si do të reagojnë futbollistët pasi bëhet fjalë për një shumë shumë të lartë dhe të padëgjuar më parë për një ndeshje.
Kujtojmë që Ferizaj është një nga skuadrat më të organizuara në Kosovë, ku shpesh herë futbollistët kanë marrë premio për fitore, derisa nuk ka pasur asnjëherë çështje pagash në klubin bardhekaltër pasi ato gjithmonë janë ekzekutuar në tre ditët e para të muajit.
