Përfaqësuesi i lartë i Bashkimit Evropian për Politikë të Jashtme, Josep Borrell, para takimit të 18 marsit ka dhënë një deklaratë për dialogun Kosovë-Serbi, teksa ka kërkuar nga të dyja palët ta pranojnë Planin evropian.
Sipas tij, Bashkimi Evropian ka bërë pjesën e vet për normalizimin e marrëdhënieve, por që ai thekson se tani është në dorën e të dyja palëve, raporton Zeri.info.
Ndër të tjera, ai ka thënë se ka ardhur koha që kjo sagë të përfundojë dhe në këtë mënyrë Serbia e Kosova të anëtarësohen në BE.
“BE-ja ka bërë pjesën e saj dhe dialogu Beograd-Prishtinë është një pjesë qendrore e mandatit tim. Askush nuk tha se një detyrë kaq monumentale sa lehtësimi i një marrëveshjeje normalizimi do të ishte e lehtë. Ka pasur ulje-ngritje dhe shumë shpesh çështjet e konsideruara të vogla dhe teknike janë dëshmuar shumë të ndjeshme dhe politike, me potencialin për t’u kthyer në të dhunshme”, thuhet në deklaratën e postuar në Twitter.
Borrelli ka thënë se lufta e agresionit rus kundër Ukrainës ndryshoi pamjen. Sipas tij, dialogu nuk ka të bëjë vetëm me Kosovën dhe Serbinë dhe shton se duhet parë në kontekstin aktual më të gjerë gjeopolitik, një moment përcaktues në historinë evropiane.
