Përfaqësuesi i Posaçëm i Bashkimit Evropian për Dialogun Kosovë-Serbi, Miroslav Lajçak ka përfunduar takimin me presidenten e vendit, Vjosa Oamani, dhe tani i është drejtuar ndërtesës së Qeverisë, ku pritet ta takojë kryeministrin Albin Kurti.
Sipas burimeve jo zyrtare, Lajçak tani do të takohet me zëvendëskryeministrin e parë, njëherësh kryenegociator i Kosovës për bisedime me Serbinë, Besnik Bislimi.
Më pas, në orën 16, Miroslav Lajçak pritet të takohet me kryeministrin Albin Kurti.
Vizita e Lajçakut në Kosovë dhe Serbi pason takimin e 27 shkurtit, kur kryeministri i Kosovës, Albin Kurti, dhe presidenti i Serbisë, Aleksandar Vuçiq, e pranuan planin evropian për normalizimin e raporteve.
Kurse rundi i ri i dialogut është caktuar të mbahet më 18 mars, në Ohër të Maqedonisë së Veriut, dhe, sipas BE-së, qëllimi kryesor është që palët të arrijnë pajtim rreth një plani, si dhe modaliteteve për zbatimin e propozimit evropian.
Pas takimeve në Kosovë, Miroslav Lajçak do të udhëtojë për në Beograd.
