Sulmuesi senegalez Sadio Manè, që këtë sezon luan me Bayern Mynih, ka folur me superlative për Bundesligën, kampionatin gjerman të futbollit. “Gjermania dhe Bundesliga shpesh janë nënvlerësuar.
Kur luaja në Angli e ndiqja këtë kampionat, ndaj nuk mbeta i befasuar kur erdha të luaj këtu. Opinion që kisha për këtë kampionat u konfirmua”, tha Manè.
Më tej, sulmuesi 30-vjeçar tha: “Jam i bindur se do të shohim të tjerë yje të Premier League që do të vijnë të luajnë këtu në Bundesliga.
Kampionati është shumë i ekuilibruar, mjafton të shohësh betejën e fortë për kreun. Më tej, atmosfera në stadiume është e jashtëzakonshme.
Ndaj, është e vështirë t’i thuash JO këtij kampionati”.
Manè rrëfen se para se të vinte në Gjermani ka takuar Cristiano Ronaldo, që: “U takova me të në Majorka para se të niste sezoni, kur transferimi im ishte mbyllur. Më përgëzoi dhe më tha se “do të luash në një klub të madh. Ky është një hap i madh për ty”.
Duke folur për objektivat e këtij sezoni, Manè tha: “Ekipi ynë ka treguar se çfarë është i aftë të bëjë. Ne kemi si objektiv të fitojmë sin ë kampionat edhe në Champions League. Këtu ka mjaft skuadra të mëdha që e duan këtë trofe, por fillimisht duhet të kalojmë PSG-në në takimin e kthimit”.
Mane u transferua verën e kaluar te Bayern Mynih duke lënë Liverpool, që këtë sezon është në krizë: “Klopp është padyshim njeriu i duhur për këtë ekip. Do ta rikthejë këtë skuadër në majë, që këtë sezon.
Lojtarët e adhurojnë, ndaj Liverpool do të rikthehet protagonist. Kanë patur mjaft dëmtime”.
