Kryeministri i Kosovës, Albin Kurti pas takimit në Bruksel ka thënë se ka qenë i gatshëm ta vendosë nënshkrimin e tij në marrëveshje, por se pala tjetër edhe pse u pajtua nuk pati gatishmërinë ta vendosë nënshkrimin në dokument.
“Sot patëm një takim pozitiv konstruktiv në Bruksel. Ky takim ishte konfirmim që propozimi evropian është i pranueshëm dhe i pandryshueshëm. Unë qysh më herët pata thënë se është bazë e mirë dhe platformë solide për ecje para. Tash ecja përpara do të jetë për planin e zbatimit. Do të ketë edhe diplomaci fluturuese po edhe takim të radhës të nivelit të lartë kah mesi i muajit të ardhshëm. Unë i falënderoj z. Borrell dhe z. Lajçak për punën që kanë bërë deri më tash dhe besoj se jemi në rrugë të mbarë dhe njëpasnjëshme të normalizimit të marrëdhënieve për fqinjësisë së mirë evropiane”, ka theksuar Kurti.
Borrell: Sot kemi arritur progres, takimi i radhës në mars
Shefi i BE-së për Politikë të Jashtme, Josep Borrell pas përfundimit të takimit ndërmjet kryeministrit Albin Kurti dhe presidentit të Serbisë, Aleksandër Vuçiq, ka thënë se dy liderët kanë bërë progres dhe janë zotuar që të zbatohet ajo çfarë është nënshkruar në Bruksel.
Ai ka vlerësuar faktin se të dy palët janë deklaruar se nuk nevojiten diskutime tjera sa i përket propozimit të BE-së.
“Presidenti Vuçiq dhe kryeministri Kurti sot janë pajtuar se nuk nevojiten diskutime të tjera sa i përket propozimit evropian që e ka titullin ‘Normalizimi i marrëdhënieve Kosovë-Serbi”, ka theksuar Borrell, sipas të cilit ky plan do të publikohet nga BE.
Ai tutje ka thënë se kjo marrëveshje mbi të gjitha është për qytetarët e Kosovës dhe Serbisë, pasi ofron mundësi të mira për lëvizje të lirë, tregti të lirë pa burokracitë e deritashme.
Ai ka thënë se për serbët në Kosovë kjo do të thotë më shumë siguri dhe përshtatshmëri dhe më shumë të drejta.
Borrell ka thënë se palët kanë shprehur gatishmërinë për zbatimin e marrëveshjeve të arritura. “Ata shprehën gatishmërinë e tyre për të zbatuar marrëveshjen, porse nevojiten ende negociata tjera për të përcaktuar modalitetet. Diplomacia ecajake do të vazhdojë”, ka shtuar Borrell, i cili ka bërë të ditur se në mes të muajit të ardhshëm do të ftojë dy liderët për një takim tjetër, për siç ka thënë finalizimin e diskutimeve.
Vuçiq: Do të kemi takime të shumta në të ardhmen
Pas përfundimit të takimit, presidenti i Serbisë, Aleksandër Vuçiq, ka thënë se nuk ka pasur marrëveshje me kryeministrin e Kosovës, Albin Kurti, porse janë dakorduar të vazhdojnë bisedimet edhe në të ardhmen.
“Një takim i vështirë dhe besoj se do të ketë shumë takime në periudhën e ardhshme. Në takimin e radhës do të shihemi më 18 mars në Maqedoninë e Veriut, kur Borrell do të vizitojë Ballkanin Perëndimor. Kurti nuk është i gatshëm ta pranojë Asociacionin tash, nëse do të jetë i gatshëm ta pranojë në të ardhmen të shohim”, ka theksuar Vuçiq.
Ai ka thënë se shpreson të gjejnë marrëveshje, por ka thënë se “kam frikë se do të ngelim në këtë çështje”. “Besoj se do t’i tejkalojmë mospajtimet dhe do të punojmë në atë që e kemi quajtur zbatim”. Por, Vuçiq ka këmbëngulur se në rend të parë duhet të jetë Asociacioni.
