Dhjetëra mijëra qytetarë brazilianë kanë dalë në rrugë për të kundërshtuar mundësinë e dhënies së amnistisë për ish-presidentin Jair Bolsonaro, i cili u dënua me 27 vite burg këtë muaj për përpjekje për grusht shteti dhe plane për të eliminuar kundërshtarët politikë.
Protestat, të zhvilluara në disa prej qyteteve më të mëdha të vendit, u shndërruan në demonstratat më të mëdha pro-demokracisë në vitet e fundit. Në Rio de Janeiro, turma të mëdha mbushën plazhin e Copacabanës, ku këngëtarët e njohur Caetano Veloso, Chico Buarque dhe Gilberto Gil, figura kyçe të rezistencës kundër diktaturës ushtarake (1964-1985), performuan këngë historike ndërsa qytetarët thërrisnin “Sem anistia” (“Pa amnisti”).
Përveç refuzimit të amnistisë, protestuesit shprehën zemërimin edhe ndaj projektligjit të miratuar së fundmi nga dhoma e ulët e parlamentit, i cilësuar nga kritikët si “Ligji i Banditëve”, i cili do ta bënte më të vështirë ndjekjen penale të ligjvënësve për veprat e tyre.
Në qytete të tjera, figura të njohura të artit dhe kinemasë iu bashkuan protestave. Aktori i njohur Wagner Moura, i nominuar për Golden Globe, tha në Salvador: “Rroftë demokracia! Rroftë Brazili!”, duke e quajtur një moment historik për demokracinë braziliane. Në São Paulo, mijëra njerëz ngritën një flamur gjigant brazilian mbi kokat e tyre, ndërsa në Belo Horizonte këngëtarja Fernanda Takai denoncoi “manovrat e turpshme” për t’i shpëtuar Bolsonaros nga burgu.
Edhe jashtë vendit pati manifestime, përfshirë Berlinin, Lisbonën dhe Londrën, ku protestuesit kërkuan që ish-presidenti të mbahet pas hekurave.
Chico Buarque, i cili dikur u detyrua të emigronte gjatë diktaturës, paralajmëroi kundër përsëritjes së amnistisë së vitit 1979 që lejoi krimet e regjimit të mbeteshin të pandëshkuara. “Ishin puçistët që kryen krimin. Ne nuk u detyrohemi asgjë,” tha ai.
