F.B.
Kampioni aktual i Kosovës, Drita, po përjeton një fillim të vështirë në edicionin e ri të Superligës, duke mbetur pa fitore pas katër javësh këtë sezon të garave.
Skuadra e drejtuar nga trajneri Zekrija Ramadani ka arritur vetëm dy barazime dhe ka pësuar dy humbje, duke grumbulluar vetëm dy pikë dhe aktualisht renditet në vendin e parafundit të tabelës, së bashku me Llapin.
Në ndeshjen e sontme, e zhvilluar në Gjilan, Drita pësoi një tjetër humbje, kësaj here nga Drenica. Kuqezinjtë e Skenderajt, të udhëhequr nga trajneri Bylbyl Sokoli, arritën të triumfojnë me rezultat minimal 1-0.
Golin e vetëm të takimit e realizoi Altin Vojvoda në minutën e 40-të, pas një aksioni të shpejtë e të saktë.
Në pjesën e dytë, Drenica u përqendrua kryesisht në fazën mbrojtëse, duke menaxhuar epërsinë dhe duke ndalur përpjekjet e gjilanasve për të gjetur golin e barazimit.
Në fund, mysafirët arritën fitore të madhe, të dytën radhazi në këtë kampionat.
Aktualisht Drenica zë vendin e katërt me shtatë pikë të tubuara.
