F.B.
Përzgjedhësi i Kosovës U21, Afrim Tovërlani, ka pranuar se grupi kualifikues është shumë i vështirë, me kundërshtarë si Rumania dhe Spanja, por theksoi se “Dardanët e rinj” do të japin maksimumin në çdo ndeshje.
Kosova U21 ka zhvilluar sot stërvitjen e fundit në Kampin Nacional në Hajvali, ndërsa nesër udhëton drejt Rumanisë. Të premten, më 5 shtator, Dardanët do të përballen me Rumaninë në ndeshjen e parë të ciklit kualifikues për Kampionatin Evropian 2027.
“Na presin dy ndeshje të vështira, me Rumaninë dhe Spanjën, por fillimisht jemi të fokusuar te ndeshja e parë. Rumania dhe Spanja janë favorite të grupit, por ne nuk dorëzohemi. Edhe herën e kaluar kemi pasur një grup të vështirë dhe ia kemi dalë me sukses. Kemi gjeneratë të re, me shumë prurje, por me një kolektiv të shëndosh besoj se mund të arrijmë rezultate pozitive. Synimi ynë pas 10 ndeshjeve është të arrijmë një kualifikim historik, por gjithçka mbetet ta tregojmë në fushë”, ka thënë Tovërlani.
Ai ka bërë të ditur se ekipi është përballur ditët e fundit edhe me disa sfida shtesë.
“Kemi pasur disa probleme me një virus që preku disa futbollistë, por stafi mjekësor është marrë me rastet dhe besoj se do të jemi të kompletuar për ndeshjen”, është shprehur tekniku kosovar.
