F.B.
Lionel Messi ka shënuar golin e tij të pesëdhjetë me fanellën e Inter Miami, duke i dhënë skuadrës amerikane një fitore historike në Kupën e Botës për Klube.
Me fitoren 2-1 ndaj FC Porto, Inter Miami tani renditet i dyti në Grupin A, pas Palmeiras.
Ndeshja e zhvilluar në Atlanta ka niasur me polemika. Porto ka kaluar në epërsi në minutën e tetë pas një penalltie të dyshimtë, të akorduar pas ndërhyrjes së VAR për një kontakt mes Noah Allen dhe Joao Mario. Samu Aghehowa është treguar i saktë nga pika e bardhë, edhe pse portieri Oscar Ustari e ka prekur topin.
Pjesa e dytë e ka sjellë kthesën. Vetëm dy minuta pas rifillimit, Telasco Segovia ka barazuar shifrat në 1-1 me një goditje të menjëhershme pas asistimit nga Weigandt.
Në minutën e pesëdhjetë e katërt, ka qenë radha e Lionel Mess që ta merrte skenën: me goditjen e tij karakteristike nga një goditje dënimi, ai ka kaluar topin mbi murin mbrojtës i cili ka përfunduar në rrjetë, për rezultatin përfundimtar 2-1.
Porto është përpjekur të rikthehet në lojë, sidomos përmes zëvendësuesve Goncalo Borges dhe William Gomes, por pa sukses. Samu ka pasur edhe një mundësi me kokë, por goditja e tij ka përfunduar jashtë.
Me këtë fitore, skuadra e trajnerit Javier Mascherano e ka zgjatur serinë e ndeshjeve pa humbje në pesë ndeshje (tri fitore e dy barazime), ndërsa Porto mbetet pa fitore pas dy ndeshjeve të para dhe do të kërkojë reagimin në sfidën e fundit të grupit ndaj Al Ahly të martën e ardhshme.
