Organizata e Veteranëve të Luftës së Ushtrisë Çlirimtare të Kosovës (OVL UÇK) ka reaguar me shqetësim dhe indinjatë të thellë ndaj vendimit të fundit të Dhomave të Specializuara në Hagë për të refuzuar kërkesën për lirimin e përkohshëm të Kadri Veselit, Rexhep Selimit dhe Jakup Krasniqit.
Sipas OVL UÇK-së, ky vendim është një dëshmi tjetër e padrejtësisë që, sipas tyre, po u bëhet drejtuesve të Ushtrisë Çlirimtare të Kosovës dhe përfaqësuesve të luftës për liri dhe pavarësi. Në reagim thuhet se trajtimi i ish-krerëve të UÇK-së nga kjo gjykatë është jo vetëm i padrejtë, por përbën edhe një pengesë në përpjekjet e Kosovës për të afirmuar drejtësinë e luftës së saj në skenën ndërkombëtare.
OVL UÇK i bën thirrje bashkësisë ndërkombëtare që të shqyrtojë këtë çështje me objektivitet dhe drejtësi, duke kërkuar t’i jepet fund, siç e quajnë ata, diskriminimit dhe trajtimit të padrejtë ndaj liderëve të UÇK-së.
“Ne do të vazhdojmë të mbrojmë luftën tonë të lavdishme për liri dhe do të qëndrojmë gjithmonë pranë atyre që dhanë gjithçka për një të ardhme më të mirë për popullin e Kosovës”, thuhet në reagimin e OVL UÇK-së.
Trupi Gjykues në Dhomat e Specializuara ka refuzuar kërkesat për lirim të përkohshëm të ish-krerëve të Ushtrisë Çlirimtare të Kosovës – Kadri Veselit, Rexhep Selimit dhe Jakup Krasniqit.
Kërkesat ishin paraqitur më 3 dhe 4 prill 2025, menjëherë pas përfundimit të dëgjimeve të dëshmitarëve të Prokurorisë. Vendimi ende nuk është bërë publik, por përmendet në dokumentin më të fundit të kryeprokurores Kimberly West, që kërkon vazhdimin e paraburgimit për Kadri Veselin.
Sipas këtij dokumenti, Paneli vlerëson se paraburgimi mbetet “i nevojshëm dhe i arsyeshëm”, duke argumentuar se vetëm në ambientet e paraburgimit të Dhomave të Specializuara mund të monitorohen komunikimet në atë mënyrë që të minimizohet rreziku për pengim të procedurës apo kryerje të veprave të tjera penale.
