Anëtari i Kryesisë së LDK-së, Muhamet Hamiti, i ka reaguar presidentes Vjosa Osmani, e cila dje ka thënë se draft-statuti i Asociacionit nuk do ta kalojë tetin e Gjykatës Kushtetuese.
Ai ka rikujtuar se Qeveria e Kosovës e ka pranuar këtë dokument.
Në profilin e tij në “Facebook”, Hamiti ka rikujtuar qëndrimet e kryeministrit Kurti, kur kishte shprehur gatishmëri edhe ta nënshkruante këtë dokument.
“Në procesin e dialogut me Serbinë, Kryeministri i Kosovës Albin Kurti e ka pranuar Marrëveshjen e Brukselit të 27 shkurtit të vitit 2023 dhe Aneksin e Ohrit të 18 marsit të atij viti, sikur edhe Draftin e BE-së për Asociacionin e komunave me shumicë serbe të 21 tetorit të viti 2023. Siç kanë vlerësuar njohësit e çështjeve kushtetuese me kohë, Drafti binte ndesh me Kushtetutën e Republikës së Kosovës dhe po të zbatohej do të krijonte autonomi politiko-territoriale për serbët. Komunikata e Qeverisë së Republikës së Kosovës e datës 26 tetor 2023 njoftonte për gatishmërinë e Albin Kurtit që t’i nënshkruante të trijat, domethanë edhe Draftin e BE-së: ‘Kryeministri Kurti rikujtoi që ai ishte i gatshëm të nënshkruaj edhe në Bruksel më 27 shkurt 2023 edhe në Ohër më 18 mars 2023, edhe sonte, më 26 tetor 2023, duke theksuar që pikërisht Samiti i Këshillit Evropian në Bruksel është ngjarja e duhur, në vendin e duhur për nënshkrim të Marrëveshjes Bazike, përfshirë edhe draftin e ofruar nga BE-ja dhe ShBA-të për zbatimin e nenit 7 në ndërlidhje të nenit 10 të Marrëveshjes Bazike’.”, ka shkruar Hamiti.
Ai ka bërë me dije se në këtë mandat Qeveria dhe Presidenca kanë bërë politikë të jashtme të çakorduar. Sipas tij, tani Kosova është duke i vuajtur pasojat e kësja politike.
“Kosova ka bërë politikë të jashtme të çakorduar në kohën e pushtetit aktual, Qeveri dhe Presidencë. Kjo kastë pushtetore nuk ia ka siguruar Kosovës asnjë njohje të re në katër vitet e kaluara; asnjë anëtarësim relevant në institucione ndërkombëtare. Vitin e kaluar Kosova nuk ia doli të anëtarësohej në Këshillin e Evropës, ndonëse kjo dukej gati e paevitueshme atëherë. Tash e dy vjet, për fajin e Qeverisë së Albin Kurtit, Kosova po i vuan pasojat e sanksioneve të BE-së”, ka shkruar Hamiti.
