Sekretari i Përgjithshëm i NATO-s tha se Kosova dhe Serbia duhet të tregojnë “fleksibilitet” dhe “t’i bëjnë kompromiset e nevojshme dhe të fokusohen në objektivat afatgjate”.
Ai tha se “stabiliteti në rajon në fund të fundit varet nga të gjitha palët, të cilat duhet të zgjedhin diplomacinë mbi dhunën”
“Zgjidhja për sigurinë e qëndrueshme është politike. Në këtë drejtim, NATO mbështet plotësisht normalizimin e marrëdhënieve midis Beogradit dhe Prishtinës, të udhëhequr nga Bashkimi Europian”, tha Rutte.
Shefi i NATO-s tha se për ta çuar përpara dialogun kërkohen “vendime të vështira”.
“E kuptoj plotësisht që kjo kërkon vendime të vështira, por duhet të kemi parasysh pamjen e gjerë. Normalizimi do të sjellë më shumë stabilitet, më shumë mundësi për investime dhe siguri të qëndrueshme në të gjithë rajonin, në dobi të të gjithëve. Ky është mesazhi që do të përcjell tek të gjithë bashkëbiseduesit e mi në rajon”, tha Rutte.
Ai tha se “për 30 vjet, NATO ka ndihmuar në ruajtjen e paqes dhe stabilitetit në Ballkanin Perëndimor.
“Përkushtimi ynë mbetet i fuqishëm edhe sot, përmes KFOR-it, i cili është aktualisht misioni ynë më i gjatë dhe më i madh”, tha Rutte.
Shefi i NATO-s tha se do të jetë “i qartë” për “atë që na pret”.
“Dekadat e përpjekjeve të vështira nuk duhet të vihen në rrezik”, tha Rutte.
Ai tha se “KFOR-i është plotësisht i përkushtuar për të reaguar ndaj çdo zhvillimi të rëndësishëm të sigurisë”.
“Në këtë drejtim, presim një bashkëpunim të vazhdueshëm ndërmjet Prishtinës dhe KFOR-it, në përputhje me angazhimet e kahmotshme. Kjo është e rëndësishme për ne. NATO do të vazhdojë të luajë rolin e saj në përmbushjen e mandatit të saj për sigurinë e të gjithëve”, tha Rutte.
