Kosova pritet të përballet me një mungesë të rëndësishme në ndeshjet e këtij muaji kundër Islandës, në kuadër të play-offit të Ligës së Kombeve.
Edon Zhegrova, një nga lojtarët më të mirë të Kosovës, nuk do të jetë i gatshëm për këto sfida për shkak të një lëndimi që e ka mbajtur jashtë fushave prej dhjetorit të vitit të kaluar.
Sipas mediave franceze dhe trajnerit të tij në Lille, ai pritet të rikthehet në fushë vetëm në fillim të muajit prill, duke e bërë të pamundur pjesëmarrjen e tij në dy ndeshjet vendimtare të Kosovës ndaj Islandës.
25-vjeçari ka filluar stërvitjet me ekipin e tij, por ende nuk është rikuperuar plotësisht për t’u rikthyer në fushë.
Kjo mungesë pritet të jetë një goditje e madhe për përzgjedhësin e Kosovës, Franco Foda, i cili duhet të gjejë alternativa për të zëvendësuar Zhegrovën në një moment vendimtar për ekipin kombëtar.
