Eksperti i çështjeve të sigurisë Hysen Gecaj, ka kërkuar nga kryeministri Albin Kurti, që të përfshijë në bisedimet me Serbinë edhe dy kushte të tjera.
Ai ka thënë se duhet të insistohet në heqjen e Kosovës nga Kushtetuta e Serbisë dhe zvogëlimin e vendeve të rezervuara për serbët në Kuvendin e Kosovës.
“KM duhet të insistojë në dy gjëra të cilat nuk po kërkohen në bisedime dhe po injorohen: heqjen e Kosovës nga Kushtetuta e Serbisë dhe zvogëlimin e vendeve të rezervuara për serbët në Kuvendin e Kosovës.
Çfarëdo marrëveshje në të ardhmen, këto dy gjëra e bëjnë Kosovën jofunksionale”, ka shkruar Gecaj, në një postim në Facebook.
Sipas tij, shumica e dyfishtë e minoritetit serb në Parlamentin e Kosovës është çështje e kushtetutës dhe ligjeve të Kosovës. “Serbia nuk përzihet, por minoriteti serb në Kosovë reziston me e heqë këtë privilegj që e ka. Prandaj, mendoj që Qeveria e Kosovës duhet të jetë e kujdesshme në këto detaje”, ka theksuar eksperti.
“E di që Serbia nuk e bën, por ne duhet t’i fusim në marrëveshje/bisedime në mënyrë që t’i bëhet Serbisë presion nga amerikanët dhe Evropa. Problemet mes nesh dhe serbëve nuk i zgjidhim dot ne. Kuvendi i Kosovës natyrisht që e bën këtë gjë, por po nuk pati marrëveshje, nuk mund ta bëjë ashtu siç nuk mundi tabelat edhe shumë gjëra të tjera. Po ta kishte Kosova këtë fuqi, ne nuk do të kërkonim mbështetjen e miqve as lejen e Serbisë. Ky është realiteti politik”, ka shtuar Hysen Gecaj.
