Asociacioni i Gazetarëve të Kosovës ka reaguar për procesin e zgjedhjes së kryetarit të ri të Komisionit të Pavarur të Medieve.
Në reagimin e publikuar në Facebook, AGK-ja potencon se votimi i një kryetari të ri, disa ditë para skadimit të mandatit të kryetarit aktual, Jeton Mehmeti, përbën përpjekje për politizim të institucionit.
“AGK-ja e sheh votimin e sotëm si përpjekje të hapur për politizimin dhe instrumentalizimin e KPM-së për interesa të partisë në pushtet, duke u bazuar në qëndrimet publike të iniciatorëve për ndryshimet e sotme”, thuhet në reagim.
AGK thekson se zgjedhja e Besnik Berishës për kryetar të KPM-së ngre pikëpyetje ligjore për mënyrën e ndryshimit të Rregullores së KPM-së, e cila parasheh që kryetari i ri zgjidhet në mbledhjen e parë pasi t’i ketë skaduar mandati ose të jetë shkarkuar kryetari aktual.
AGK-ja thekson se KPM si organ kushtetues, duhet ta ruajë pavarësinë e plotë dhe të mos lejojë ndërhyrjet politike.
