F.B.
Përzgjedhësi i Përfaqësueses U21 të Kosovës në futboll, Afrim Tovërlani, ka thënë se të gjithë lojtarët janë të njëjtë për të.
Ai ka thënë se disa lojtarë do ta kenë rastin t’i tregojnë vlerat e tyre në ndeshjet kualifikues për “Euro 2025”, kundër Hungarisë dhe Izraelit.
Kosova U21 është grumbulluar për herë të parë pas gjashtë muajsh. Në Federatën e Futbollit të Kosovës vlerësojnë se atmosfera tek ekipi U21 është shumë e mirë.
Për shkak të lëndimeve, Tovërlani nuk do t’i ketë në dispozicion Arian Llugiqin, Bleron Krasniqin dhe kapitenin Valon Zumberi.
“Është një mundësi për të tjerët të tregojnë vlerën e tyre në mungesë të këtyre lojtarëve” tha Tovërlani. Pjesë e Shpresave të Kosovës janë shumë futbollistë të klubeve të Kosovës. Por ai është kundër të bëhet ndarja e lojtarëve në varësi se prej nga vijnë ata. “Fillimisht nuk ka ndarje të futbollistëve nga liga e Kosovës dhe nga vendet jashtë Kosovës. Do të mundohem gjithmonë që të jem korrekt dhe t’i thërras ata të cilët tregojnë më së tepërmi dhe janë në formë” u shpreh Tovërlani.
Kosova U21 është në Grupin D së bashku me Gjermaninë, Poloninë, Izraelin dhe Estoninë.
