F.B.
Qeveria e Kosovës miratoi sot Projektligjin për Sigurimin e detyrueshëm shëndetësor.
Kryeministri Albin Kurti para kabinetit qeveritar tha se synim i tyre është që të garantojnë sigurim publik shëndetësor për të përmirësuar cilësinë e jetës.
“Ku ka më mirë se ta fillojmë rendin e ditës me këtë punë…”, tha Kurti.
Ndërkaq, ministri i Shëndetësisë, Arben Vitia tha se kjo nismë ligjore është paraprirë nga një proces i detajuar planifikimi, analizimi e diskutimi.
“Ky projektligj është hapi themelor drejt krijimit të sigurimeve shëndetësore… Me këtë nismë themelohet fondi i sigurimit të detyrueshëm shëndetësor…”, tha ai.
“Me këtë rregullohen edhe çështjet e mbledhjes së kontributeve nga qytetarët për fondin e sigurimeve shëndetësore dhe këto kontribute do të jenë një nga burimet e rëndësishme të financimit të shëndetësisë në të ardhmen e afërt”, tha tutje ministri.
Ai tha se ky është një moment vendimtar për vendin, për marrëdhënien qytetar –shtet dhe për ngritjen e sistemit shëndetësor në një nivel të ri.
“Zbatimi i këtij ligji do të jetë një nga sfidat më domethënëse të qeverisjes sonë…”, tha ai.
Sipas tij, për herë të parë përcaktohen rregullat për listën e barnave të rimbursueshme që do të transformojë rrënjësisht mbështetjen që shteti jep për qytetarët.
