Kryeministri i Kosovës, Albin Kurti dhe presidenti i Serbisë, Aleksandër Vuçiq do të takohen të mërkurën, më 26 qershor në Bruksel, ka konfirmuar zëdhënësi i Bashkimit Evropian, Peter Stano.
Takimi po mbahet në kuadër të dialogut për normalizimin e marrëdhënieve dhe nikoqirë do të jenë shefi i diplomacisë evropiane, Josep Borrell, dhe i dërguari special evropian për dialogun, Miroslav Lajçak.
Ky do të jetë takimi i parë në nivelin më të lartë politik këtë vit. Gjithashtu është ky takimi i parë i liderëve të Kosovës dhe të Serbisë, pas sulmit në Banjskë që ndodhi më 24 shtator të vitit të kaluar.
Albin Kurti dhe Aleksandër Vuçiq janë takuar për herë të fundit më 14 shtator 2023 ku u diskutua sekuencimi i zbatimit të marrëveshjeve të arritura në Bruksel dhe Ohër në fillim të vitit 2023.
Takimi rezultoi i pasuksesshëm. Në fund të takimit kryeministri i Kosovës akuzoi hapur ndërmjetësuesin evropian, Miroslav Lajçak se “ka humbur neutrlitetin”.
Në fund të tetorit, pati edhe një tjetër përpjekje e pasuksesshme për të afruar palët, ku u përfshinë edhe liderët kryesorë nga vendet evropiane: kancelari gjerman Olaf Scholz, presidenti francez Emmanuel Macron dhe kryeministrja italiane Giorgia Meloni.
Kurti dhe Vuçiq kanë pasur takime të ndara me liderët evropianë, por marrëveshja e tyre nuk ka qenë e mundur. Përderisa kryeministri i Kosovës këmbënguli në nënshkrimin e tërë pakos së marrëveshjeve, presidenti serb vazhdoi që ta refuzojë të njëjtën.
Për momentin, pala evropiane nuk ka detaje për agjendën e takimit të ardhshëm të liderëve. Takimi i liderëve në kuadër të dialogut do të mbahet në momentin kur zyrtarëve evropianë skadon mandati pasi ata për gati pesë vite janë marrë me procesin e normalizimit të marrëdhënieve mes Kosovës e Serbisë.
Shefi i diplomacisë evropiane Josep Borel do largohet nga ky post në vjeshtë, ndërsa Miroslav Lajçak i cili tashmë është emëruar për ambasador të BE-së në Zvicër, do mbajë postin derisa të gjendet zëvendësimi për të.
