F.B.
Ish-reprezentuesi i Kombëtares Shqiptare, Armend Dallku e ka cilësuar bashkëpunimin e Federatës Shqiptare të Futbollit me atë të Serbisë për të kandiduar së bashku për organizimin e Kampionatit Evropian të futbollit për grupmoshat U21 në vitin 2027 si një bashkëpunim që duhet të shihet vetëm nga ana sportive.
Dallku ka theksuar se ky moment duhet të shfrytëzohet nga Kosova dhe se ky mund të jetë një pikënisje që të vijë deri te njohja e Kosovës nga Serbia.
“Normalisht neve si kosovarë nuk na vjen mirë kjo punë nga ana e së kaluarës sepse shumë me të drejtë e kanë thënë disa njerëz që janë ende plagët të hapura, mirëpo duhet ta shohim nga ana sportive, nga ana organizative sepse ka përfitime të mëdha edhe pse jo këtë bashkëpunim ne duhet ta shfrytëzojmë si Kosovë për përfitime tona, pse mos të ofrohemi, pse mos të tentojmë deri te njohja. E kemi parë në intervistën e fundit edhe te kryetari i Federatës së Futbollit Shqiptar Armand Duka që kjo mund të jetë edhe një pikënisje që të vijë deri te njohja e Kosovës nga Serbia sepse kemi shumë vite që po tentojmë këtë, mirëpo edhe përmes sportit pse mos të jetë”, tha Dallku.
Ai ka shtuar se një organizim kaq i madh nuk vie shpesh në duart e një vendi dhe se nuk duhet të shihet si një problematikë e madhe sepse pas kësaj mund të vijnë edhe organizime shumë më të mëdha që UEFA mund t’ia besojë vendeve tona.
Dallku: Nuk e shoh si problematikë të madhe këtë bashkëpunim
“Normalisht që shumë tifozë janë të zhgënjyer në këtë drejtim dhe ne nëse e shohim nga ana politike jemi me një dozë jo realist, mirëpo nëse e shohim nga ana sportive, një organizim i tillë nuk të vjen shpesh në dorë sepse kjo punë shkon shkallë-shkallë organizimet. Jo rastësisht është bërë finalja e Ligës së Konferencës në Tiranë, pastaj vjen evenimenti tjetër si ky. Nëse ky eveniment kalohet me sukses, pse mos ta kemi një finale të Ligës së Kampionëve në të ardhmen, pse mos ta kemi një organizim më të madh…Ky është mendimi imë personal dhe këtë nuk duhet ta sheh dikush si problematike këtë. Nuk e shoh që është problematikë e madhe sepse janë dy shtete të ndryshme që do ta bëjnë organizimin e vet”, theksoi Dallku.
