Nënkryetari i Lidhjes Demokratike të Kosovës, Lutfi Haziri tha se ftesa e kryeministrit Albin Kurti për t’u takuar me kryetarin e partisë më të vjetër në vend, Lumir Abdixhiku erdhi në një kohë kur “pritjet dhe angazhimet në Kosovë lidhen me Këshillin e Evropës”.
Haziri tha në Frontal në T7 se ky ngërç në marrëdhëniet me partnerët ndërkombëtarë “e reflekton gjendjen që është brenda”.
“Ftesa erdhi në një kohë ku pritjet dhe angazhimet në Kosovë lidhen me Këshillin e Evropës dhe anëtarësimin përmes Këshillit të Ministrave që është hapi i fundit. Krejt ky ngërç që ka ndodhë dhe raporti që është krijuar i Kosovës me partnerët ndërkombëtarë e reflekton gjendjen që është brenda. Tash me të ftu me folë për një çështje që nuk është, le të themi, çështje që e reflekton farë krize parlamentare”, tha Haziri.
Ai tha se Kuvendi është “pasqyra e qeverisjes”.
“Kuvendi i Kosovës ka probleme serioze sepse është pasqyra e qeverisjes. Kjo është e vërtetë. Por asnjëherë nuk ka qenë shkaktare LDK-ja ose opozita, pjesa tjetër e opozitës, që të kemi krizë parlamentare”, tha Haziri.
Nënkryetari i LDK-së tha se “nëse e pasqyrojmë gjendjen në Kuvend, është e keqe, por ajo e pasyqron qeverinë”.
I pyetur për pranimin e ftesës për takim me kryeministrin nga ana e kryetarit të PDK-së, Memli Krasniqi, Haziri tha: “PDK-ja janë duke i pa zgjedhjet ndryshe nga ne si LDK. Është çështje e vlerësimit të tyre”.
Kryetari i LDK-së, Lumir Abdixhiku, e konsideroi të vonuar ftesën e Kurtit për takim, dhe në letrën që ia ktheu kryeministrit, e akuzoi atë se e ka shuar frymën e bashkëpunimit pozitë-opozitë.
