Sekretari amerikan i Shtetit, Antony Blinken i ka thënë Izraelit dhe Hamasit se “ka ardhur koha” për një marrëveshje për të sjellë një armëpushim në Gaza dhe për të liruar pengjet e mbetura atje.
Sekretari amerikan i shtetit, Antony Blinken tha se një marrëveshje ishte në tryezë dhe Hamasi duhet të pajtohet me të. Ndërmjetësuesit po presin një përgjigje nga Hamasi për propozimin e fundit. Marreveshja thuhet se përfshin një armëpushim 40-ditor dhe lirimin e më shumë se 30 pengjeve izraelitë në këmbim të shumë të burgosurve palestinezë.
Rreth 130 pengje nga 253 të rrëmbyer nga Hamasi gjatë sulmit të tij të paprecedentë ndaj Izraelit më 7 tetor mbeten të pagjetur. Të paktën 34 prej tyre supozohet se kanë vdekur. Pjesa tjetër janë liruar ose shpëtuar. Diplomati i lartë amerikan më vonë vizitoi portin izraelit të Ashdod, rreth 30 km në veri të Gazës. Ashdod u hap kohët e fundit për dërgesat e ndihmës të destinuara për në Gaza, ku OKB-ja ka paralajmëruar për mungesa të mëdha ushqimore dhe rrezikun e urisë.
Blinken përsëriti gjithashtu qëndrimin e SHBA-së se Izraeli nuk duhet të nisë një inkursion ushtarak në qytetin jugor të mbipopulluar të Rafahut, pa një plan të qartë për të mbrojtur më shumë se një milion palestinezë që janë strehuar nga lufta atje në kushte të rënda humanitare.
Rafah është i vetmi qytet i madh në Gaza që forcat tokësore izraelite nuk e kanë marrë nën kontroll gjatë gjysmë viti të luftës. Megjithatë, qyteti është goditur vazhdimisht nga sulmet ajrore vdekjeprurëse të Izraelit.
Kryeministri izraelit Benjamin Netanyahu, i cili gjithashtu takoi Blinken të mërkurën, tha se Izraeli do të nisë një pushtim të Rafahut pavarësisht nga bisedimet e armëpushimit me Hamasin.
OKB-ja, aleatët perëndimorë të Izraelit dhe agjencitë humanitare kanë paralajmëruar të gjithë se një sulm në Rafah rrezikon një fatkeqësi humanitare.
Presidenti palestinez me bazë në Bregun Perëndimor, Mahmoud Abbas tha se kjo do të ishte “katastrofa më e madhe në historinë e popullit palestinez”, sepse, tha ai, do të shkaktonte zhvendosje në shkallë të gjerë të palestinezëve nga Gaza tërësisht.
