Presidenti Zelensky ka kërkuar ndihmë shtesë në një takim virtual me zyrtarët amerikanë të mbrojtjes.
Presidenti ukrainas Volodymyr Zelenskiy bëri thirrje të premten për dërgimin e sistemeve shtesë të mbrojtjes ajrore në Kiev për t’u mbrojtur ndaj sulmeve ruse, duke shtuar se pauza amerikane e financimit kishte ndihmuar Moskën të merrte iniciativën.
“Këtë vit, aeroplanët rusë kanë përdorur tashmë më shumë se 9,000 raketa kundër Ukrainës dhe ne kemi nevojë për aftësinë që të rrëzojmë aeroplanët luftarakë në mënyrë që ata të mos afrohen me pozicionet dhe kufijtë tanë,” ka deklaruar Zelenskiy në takimin virtual me sekretarin amerikan të Mbrojtjes Lloyd Austin.
Kurse Austin, nga ana e tij, tha se takimi do të fokusohej në aftësitë e mbrojtjes ajrore të Ukrainës. Takimi vjen disa ditë pasi Kongresi doli nga një gjysmë viti bllokimi për të miratuar një paketë ndihme prej 61 miliardë dollarësh për Ukrainën.
Administrata e Presidentit Joe Biden shpejt njoftoi për 1 miliard dollarë artileri, mbrojtje ajrore dhe pajisje të tjera do të shkojnë në linjat e frontit ukrainas.
“Ndërsa ne prisnim një vendim për mbështetjen amerikane, ushtria ruse arriti të merrte iniciativën në fushën e betejës”, tha Zelenskiy.
Shtetet e Bashkuara shpresojnë që dërgesat e tyre të reja të armatimit do ta ndihmojnë Ukrainën të rindërtojë mbrojtjen pas boshllëkut të ndihmësve amerikane, por nuk presin që Kievi të nisë operacione sulmuese në shkallë të gjerë kundër forcave ruse në një afat të afërt.
Fluksi i armëve mund të përmirësojë shanset e Kievit për të shmangur një përparim të madh rus në lindje, pak më shumë se dy vjet që nga fillimi i pushtimit në shkallë të plotë të Moskës, thonë analistët ushtarakë.
Por mbetet e paqartë se sa presion mund të ushtrojë Kievi ndaj Rusisë pas muajsh racionimi të artilerisë pasi rezervat e saj ishin të ulëta. Kievi gjithashtu përballet me mungesë të trupave në fushëbetejë e gjithashtu mbetet pikëpyetje fuqia e fortifikimeve përgjatë një linjës së gjerë të frontit rreth 1000 km.
