Sot shënohet Dita Ndërkombëtare e Tokës. Në “Mirëmëngjesi Kosovë” në Radio Televizionin e Kosovës, Donika Çetta, drejtoreshë e Drejtorisë së Hapësirave Publike dhe Parqeve, nga Komuna e Prishtinës tha se do mbillen pemë në disa hapësira ne kryeqytet.
“Fillojnë punimet për krijimin në parkun rekreativ në Ulpianë, do të mbillen pemë në kryqëzimin e rrugëve Dëshmorët e Kombit dhe 28 Nëntori, që është hapësira e gjelbër mbi Postë, projekt i filluar me UNDP-në, gjithashtu do të fillojë edhe trajtimi i hapësirës së gjelbër në mënyrë që të ketë hapësirë për të rinjtë dhe të gjithë ata që dëshirojnë të relaksohen”, tha ajo.
Ajo kërkoj që si shoqëri duhet të jemi të vetëdijshëm se nga toka dhe ekosistemet e saj e kemi edhe jetën, por edhe ushqimin.
“Andaj kjo ditë është vetëm simbolike për 365 ditë të tjera që duhet punuar vazhdimisht dhe nxitur qytetarët për aktivizëm, që ta mbrojmë natyrën dhe mjedisin”, theksoi ajo.
Kjo ditë ka filluar të festohet nga Kombet e Bashkuara që nga viti 2009, edhe pse si revoltë e qytetarëve ka nisur në vitet 70’ në Amerikë nga kongresmeni Nelson për shkak të një fatkeqësie natyrore, naftës së derdhur në ujë që ka ndotur ujin. RTKlive
