F.B.
Gazetari Lirim Mehmetaj, ka thënë se padia i është bërë nga radhët e Lëvizjes Vetëvendosje, Dimal Basha.
“Mu më ka bë kallëzim penal pushteti, përmes deputetit Dimal Basha. Basha e ka bërë një pretendim që disa qytetarë të një rajoni të Kosovës kanë mangu diçka nga disa qytetarë, ai ka nënkuptuar që qytetarët e Drenicës që vijnë në Prishtinë, duhet mos me pasë kërkesa të shtuara, qysh thotë ai, ‘po lypin me u nxe’”, ka deklaruar ai.
Ai ka theksuar se gjatë intervistimit, prokurorja e rastit ka qenë e shqetësuar.
“Unë nuk pata çka me deklaru, as nuk mora avokat, sepse nuk e trajtoj proces të rregullt ligjor. Prokurores i ofrova ndihmë, i thash kushdo që ka bërë presion, ne jemi në anën tende, dhe mundemi me ekspozu atë lloj shantazhusi që të ka detyru dhe obligu me përfshi vetën në këtë gabim, që mundet me kushtu edhe me karrierë, ulje page”, ka deklaruar ai.
Lidhur me rastin e gazetarit Mehmetaj, ka pasur reagime të shumta nga shoqëria civile, personalitete të rëndësishme publike, opozita, Asociacioni i Gazetarëve të Kosovës etj, të cilët njëzëri e kanë dënuar veprimin e prokurores për thirrjen e kryeredaktorit të AP-së në cilësinë e të pandehurit për veprën penale “nxitje e përçarjes dhe mosdurimit”.
