F.B.
Skuadra e Llapit ka shënuar fitore tejet të rëndësishme në udhëtim te Fushë Kosova, duke iu afruar vetëm në një pikë Ballkanit që është lider.
Llapjanët realizuan fitore me rezultatin 0:3. Që nga fillimi e deri në fund, të besuarit e Tahir Batatinës ishin dominues.
Loja e mirë e tyre u shpërblye me gol në minutën e 23-të, kur realizoi Hamdi Namani.
Ajo që vlen të ceket nga pjesa e parë është se sulmuesi i Llapit, Muhamet Hyseni shënoi tri gola dhe që të tria u anuluan për shkak të pozitës jashtë loje.
Ani pse nuk iu llogaritën golat, Hyseni nuk u dorëzua dhe në minutën e 57-të shënoi edhe njëherë, e këtë radhë të rregullt për 0:2.
Nga minuta e 65-të vendësit luajtën me një lojtar më pak, pasi Lis Demiri u ndëshkua me të kuq, pas dy të verdhëve.
Këtë e shfrytëzuan mysafirët, tre minuta më vonë, Ilir Blakqori shënoi për 0:3.
Pas kësaj fitoreje, Llapi tash ka 43 pikë për pozitën e dytë, një më pak se Ballkani që është i pari. Në krahun tjetër, Fushë Kosova mbetet e parafundit me 11 pikë.
