Një delegacion i kryesuar nga shefi i inteligjencës izraelite David Barnea u largua nga Kajro të martën, raportuan mediat izraelite dhe amerikane.
Barnea u takua me drejtorin e CIA-s William Burns në kryeqytetin egjiptian për bisedime mbi një plan të ndërmjetësuar nga Katari për të ndalur përkohësisht luftimet në Gaza.
Wall Street Journal, duke cituar zyrtarë që janë në dijeni për atë çka po ndodh në bisedime, ka raportuar se delegacioni i Barneas ishte larguar nga kryeqyteti egjiptian “pa mbyllur asnjë nga boshllëqet kryesore në negociata”.
Kanali televiziv shtetëror egjiptian Al Qahera raportoi duke cituar një zyrtar të lartë egjiptian se bisedimet do të vazhdojnë edhe për tre ditë të tjera.
I njëjti zyrtar tha se bisedimet kishin qenë kryesisht “pozitive”, raportoi kanali televiziv.
Zëdhënësi i Këshillit të Sigurisë Kombëtare të SHBA-së, John Kirby i quajti negociatat “konstruktive dhe që janë duke ecur në drejtimin e duhur”.
“Asgjë nuk bëhet derisa të bëhet gjithçka”, u tha ai gazetarëve në Shtëpinë e Bardhë.
Derisa nga ana tjetër, delegacioni i Hamasit ka shkuar në Kajro për të takuar ndërmjetësuesit egjiptianë dhe ata të Katarit.
Një burim i Hamasit i tha agjencisë së lajmeve Agence France-Presse (AFP) se një delegacion po shkon në Kajro për të takuar ndërmjetësuesit egjiptianë dhe ata të Katarit, pasi negociatorët izraelitë zhvilluan bisedime me ndërmjetësit të martën.
Presidenti turk Recep Tayyip Erdoğan, një kritik i hapur i sjelljes së Izraelit në luftën e Gazës, ishte gjithashtu në Kajro të mërkurën për bisedime me presidentin Abdel Fattah al-Sisi, thotë AFP.
Ndërmjetësuesit po garojnë për të siguruar një pauzë të luftimeve përpara se Izraeli të vazhdojë me një inkursion tokësor në shkallë të plotë në qytetin jugor Rafah të Rripit të Gazës, ku më shumë se 1.4 milionë palestinezë janë të bllokuar.