F.B.
Ish-kryeministri i Kosovës, Avdullah Hoti, është shprehur i lumtur me lajmin se Izraeli ka vendosur t’i heqë vizat për qytetarët e vendit tonë.
Përmes një postimi në Facebook, Hoti ka thënë se si kryetar i Grupit të Miqësisë Kosovë-Izrael ka punuar në thellimin e bashkëpunimit ndërmjet dy vendeve.
”Jam i lumtur që sa isha Kryeministër e pranuam njohjen nga Izraeli dhe tash si Kryetar i Grupit të Miqësisë Kosovë-Izrael ta marrë lajmin se së shpejti lëvizim pa viza në Izrael. Si Grup i Miqësisë kemi punuar shumë që të thellojmë bashkëpunimin ekonomik dhe diplomatik me Izraelin. Ndër kërkesat e para në vizitën që kishim në Izrael si Grup i Miqësisë kërkuam heqjen e vizave për qytetarët tanë. Kjo është një mundësi për qytetarët dhe bizneset t’i shkëmbejnë përvojat e tyre. Zoti e bekoftë Republikën e Kosovës dhe miqtë e saj”, ka shkruar Hoti.
