Komisioni për Legjislacion e ka miratuar në parim Projektligjin për noterinë, duke i hapur rrugë dërgimit për votim në seancën e Kuvendit të Kosovës.
Në mbledhjen e këtij komisioni, ku pjesëmarrës ishin vetëm deputetët e Lëvizjes Vetëvendosje, janë prezantuar ndryshimet e bëra në kuadër të këtij projektligji. Me këtë rast ministrja e Drejtësisë, Albulena Haxhiu tha se kusht për ushtrimin e detyrës së noterit do të jetë provimi i jurisprudencës , derisa bëri me dije se më 27 janar do të mbahet provimi i noterisë, për të cilin u zotua se do të ketë transparencë.
“E kemi vendosur provimin e jurisprudencës si kusht për ushtrimin e detyrës së noterit me qëllim të sigurimit se noterët të cilët kanë autorizime publike dhe ofrojnë shërbime profesionale juridike noteriale të jenë jurist të kualifikuar”, ka thënë Haxhiu.
Ajo theksoi se kanë vendosur për një gjë të tillë sepse noteri merret me shërbime publike, prandaj sipas saj është e rëndësishme që “noterët të jenë sa më profesional dhe të ofrojnë shërbime sa më profesionale”.
Ministrja tutje tha se me projektligjin e ri është paraparë edhe forcimi dhe rritja e efikasitetit të sistemit disiplinor të noterëve me anë të themelimit të Komisionit të pavarur disiplinor, i cili do të përbëhet nga dy gjyqtarë dhe një noter.
Komisioni për Legjislacion në këtë mbledhje e ka miratuar edhe raportin e zbatimit të Ligjit për Agjencinë për Parandalimin e Korrupsionit.
