f.b.
Kombëtarja e Kosovës ka zbarkuar në Derby të Anglisë, ku nesër (14.00) do të zhvillohet ndeshja e kthimit e raundit të parë kualifikues të Euro 2026 në hendboll.
Djelmoshat tanë janë të motivuar deri në pikën e fundit, të etur për fitoren e radhës në kualifikuese.
Pas fitores (30:22) në kryeqytetin e Kosovës, synojnë fitoren tjetër ndaj Britanisë së Madhe në Derby.
Kosova hiqet favorite e madhe ndaj britanikëve.
Selektori i kombëtares së Kosovës, Bujar Qerimi, kërkon koncentrim e angazhim maksimal nga të përzgjedhurit e tij në duel me britanikët.
“Komoditet nuk ka në asnjë lojë, duhet angazhim siç e kemi bërë në 20 minutat e fundit të ndeshjes së parë.
Çdo lojë është ndryshe nga tjetra, duhet angazhim maksimal dhe besoj se nuk duhet me pas ndonjë të papritur”, tha Qerimi.
Selektori i Dardanëve kërkon kujdes nga djelmoshat e tij, sepse nuk ka kombëtare të dobëta.
“Sot nuk ka ekipe të dobët apo dallime të theksuara.
E kemi pa edhe pjesën e parë në Prishtinë por që duhet angazhim maksimal në të dy 30 minutat e lojës.
Duhet koncentrim dhe logjikisht rezultati është në favor tonin”, – ka nënvizuar selektori.
E mira e të mirës te Kosova është se janë të kompletuar. “Jemi komplet sikur në ndeshjen e kaluar.
Do të mundohem, me menaxhuar gjithë lojtarët e me mbajt freskinë”, ka përfunduar Qerimi.
