Rreth 50 prodhues vendor kanë prezantuar ushqimet përkatësisht prodhimet e tyre në “Panairin Agroushqimor Gjakova 2023”. Prodhuesit janë shprehur të kënaqur me mundësitë e afruara nga Drejtoria për Bujqësi dhe Zhvillim rural në Gjakovë.
“Ky panair është mjaft i qëlluar për prodhues por edhe për konsumatorë sepse po bëhen edhe njohje të reja në mes prodhuesve, shkëmbim të prodhimeve të ndryshme, prandaj jam shumë i kënaqur. Unë sot kam prezentuar lëngun e aronisë. Dashtë Zoti që të vazhdojmë me këtë ritëm:, thotë Xhavit Alija, prodhues i aronisë dhe manaferrave.
“Është hera e parë që po marr pjesë dhe po më duket që do të jetë një ndihmesë e mirë për të gjithë ne që merremi me veprimtari të ndryshme prodhuese”, thotë Isuf Salihu, prodhues i alkoolit dhe verërave.
Ndërsa, Diana Daka – Nani, prodhuese e ushqimeve vegjetariane, thotë se një panair i tillë patjetër që është i mirëseardhur në mënyrë që opinioni të mësoi më tepër për ushqim vegjetarian e që janë risi në tregun kosovar.
“Prodhuesit gjithmonë kanë nevojë me i prezantuar prodhimet e veta që i prodhon, edhe me i shitë, edhe me i shijua njerëzit me i pa se çfarë prodhimesh janë, pothuajse 90 % janë prodhime vendore dhe me thanë të drejtën, një pjesë e madhe e tyre janë edhe ekologjike”, thotë Halim Rrustemi, prodhues dredhëzave, lajthive dhe reçelrave.
Cilësia e prodhime vendore është gjithnjë e më mirë, ku shumë prej tyre po depërtojnë edhe në tregun e huaj thotë drejtori i DBZHR, Gani Hajdari.
“Ne na gëzon fakti se këtu kemi edhe prodhues që eksportojnë produktet e tyre në Zvicër, Gjermani, Holandë, Kanada, pra prodhime të ndryshme. Ndryshe Gjakova edhe në të kaluarën është njohur për eksport të prodhimeve të ndryshme”, thotë Hajdari.
Zyrtarët e komunës së Gjakovës u zotuan për përkrahje të vazhdueshme për prodhuesit agro-ushqimor, që sipas tyre, po rriten dita – ditës.
