Armëpushimi mes Izraelit dhe Hamasit i paraparë të hyn në fuqi të enjten paradite do të nisë të premten në orën 7 sipas kohës lokale ndërsa pengjet e para do të lirohen në ora 16 po ashtu sipas kohës lokale.
Kështu ka njoftuar Katari, një vend që ka ndërmjetësuar në arritjen e këtij armëpushimi.
E një zëdhënës i ministrisë së jashtme të Katarit ka thënë se nga pengjet e para do të lirohen fillimisht 13 gra dhe fëmijë.
Ndërsa Forcat Mbrojtëse të Izraelit, përmes një komunikate kanë thënë se kanë arrestuar Mohammad Abu Salmiyan, drejtorin e spitalit më të madh në Gazë, Al-Shifa. Abu Salmiya është ndaluar pas dëshmive se spitali Al-Shifa, nën drejtimin e drejtpërdrejt të tij, ka shërbyer nga Hamasi si Qendër e Komandës dhe Kontrollit.
Ndërsa Ministria e Shëndetësisë e Gazës që drejtohet nga Hamasi, ka thënë se pas arrestimit të drejtorit të spitalit, ka ndërprerë bashkëpunimin me OKB-në dhe Organizatën Botërore të Shëndetësisë të cilën e ka fajësuar për shkak të dështimit të mbrojtjes së personelit të vet pasi dje forcat izraelite kishin ndaluar një autokolonë të kësaj agjencie derisa po përpiqej të evakuonte civilët nga Al-Shifa.
