Kombëtarja e Kosovës ka regjistruar fitoren e dytë në kuadër të ciklit kualifikues për Kampionatin Evropian “Euro 2024”.
Të përzgjedhurit e Primoz Gliha triumfuan sonte 1:0 ndaj Izraelit, në ndeshjen e zhvilluar në stadiumin “Fadil Vokrri”, shkruan Gazeta Express.
Autori i golit të vetëm, Milot Rashica, pas ndeshjes u shpreh i lumtur për golin dhe fitoren, por pati ankesa për gjendjen e fushës.
“Besoj që është gjithmonë kënaqësi të shënojë, sidomos me Kombëtaren. Kemi pasur periudhë të vështirë në fillim, por po përmirësohemi. Fusha na ka pamundësuar të luajmë lojë të mirë për sy. Por me rëndësi është që shënuam fitoren dhe morëm tri pikët. Mendoj se të gjithë janë të lumtur”, tha fillimisht ai.
“Aftësia e Muriqit në lojën në ajër më lehtëson shumë punën. Më duhet vetëm ta përcjell atë. Është prej pozitave që më pëlqen më së shumti kjo ku kam luajtur sonte. Lojtarët e rinj janë përshtatur shumë shpejtë. Kanë luajtur lojë të mirë, kanë luftuar për çdo top. Kemi pasur raste edhe më shumë se në ndeshjet e tjera, kur terreni ishte më i mirë. Është dashur t’i shfrytëzojmë edhe dy-tri raste. Tani do të provojmë t’i fitojmë dy ndeshjet e ardhshme. Është mëkat i madh që po e humbim një mundësi shumë të madhe. Ka qenë shumë e mundshme, por duhet të shikojmë para”, deklaroi Rashica.