Ish-inspektori i AKI-së dhe ish-zyrtari i AAK-së, Burim Ramadani, e ka publikuar një draftstatut të Asociacionit të komunave me shumicë serbe, e për të cilin thotë se nuk e di nëse është në mënyrë përfundimtar i pranuar nga Kosova ky version.
Megjithatë, ai ka thënë se nëse ky version është zyrtar, atëherë Kosova duhet të fitojë diçka të madhe në kompensim të zbatimit të tij. “E lexova dhe ri-lexova shumë herë Draft-Statutin Europian për Asociacionin. Edhe versionin anglisht, edhe versionin në gjuhën shqipe, e cili është përkthim jozyrtar. Nuk e di a është në mënyrë përfundimtare i pranuar nga Kosova ky version. Sidoqoftë, nëse ky dokument do të mund të ndryshohet – vështirë të thuhet, por ajo që besoj unë është që Kosova duhet të fitojë diçka seriozisht të madhe si parakusht për zbatim të këtij dokumenti. Sepse, ky Draft-Statut është shumë i gjerë dhe i thellë”, ka theksuar Ramadani, pasi e ka publikuar versionin e këtij dokumenti në gjuhën shqipe dhe atë angleze. Ai tutje ka thënë se ky draftstatut është “serioz në kompetencat që ia atribuon Asociacionit, por mbi të gjitha shumë serioz në mundësinë që ia jep Serbisë që të funksionojë brenda Kosovës. Dhe kjo sidomos në arsim dhe shëndetësi, kujdes social, në financim dhe donacione, e të ngjashme”.
Sipas Ramadanit, asociacioni quhet: Asociacioni i Komunave me Shumicë Serbe në Kosovë. Selia e Asociacionit do të jetë në Mitrovicën e Veriut, përpos nëse komunat anëtare vendosin ndryshe pastaj, derisa draft-Statuti ka gjithsej 45 nene dhe ndahet në 7 kapituj.
Gjithnjë sipas draftstatutit të publikuar nga Ramadani, asociacioni, i themeluar me këtë statut, ofron një kornizë vetë-menaxhuese për komunitetin serb të Kosovës brenda nivelit ekzistues komunal të vetëqeverisjes lokale dhe nuk do të fitojë kompetenca ekzekutive shtesë në krahasim me komunat anëtare të saj. Korniza përfshin mbështetjen e ofrimit të shërbimeve të koordinuara në fusha specifike, me mundësinë për mbështetje financiare nga Serbia dhe një kanal efektiv komunikimi i drejtpërdrejtë për komunitetit serb të Kosovës në Qeverinë e Kosovës përmes Ministrisë së Administrimit të Pushtetit Lokal.
