Kryeministri Albin Kurti ka qëndruar mbrëmë në Spanjë, ku ka marrë pjesë në kongresin e organizatës më të madhe socialedemokrate në Evropë – PES, në cilësi të kryetarit të Lëvizjes Vetëvendosje, pasi subjekti i tij politik u bë anëtar i kësaj organizate.
Ai para anëtarëve të kësaj organizate ka thënë se Qeveria e Kosovës nën drejtimin e tij po e forcon sundimin e ligjit dhe po e lufton korrupsionin dhe krimin e organizuar.
“Me një përkushtimi të palëkundur ndaj sundimit të ligjit dhe një lufte të vendosur kundër korrupsionit dhe krimit të organizuar, po krijojmë mundësi të paprecedenta për prioritete të reja — drejtësi sociale dhe barazi, punësim dhe politika të rishpërndarjes në Kosovë, duke i sjellë dobi të gjithëve. Këto veprime tona po adresojnë ato që dy vjet e gjysëm para se të vinim ne në pushtet nuk ekzistonin fare si prioritete”, tha Kurti.
Ai po ashtu ka folur edhe për kohën sfiduese me përplot ngjarje tragjike, duke përfshirë agresionin e pamëshirshëm të Rusisë në Ukrainë, zhvendosjen e armenëve nga Nagorno-Karabakh dhe konfliktin në Izrael dhe në Rripin e Gazës, teksa ka përmendur edhe agresionin e Serbisë në Kosovë me sulmin e 24 shtatorit nga grupe terroriste e paramilitare serbe.
“Ky sulm terrorist dëshmon që sot ka forca që synojnë të provokojnë konflikte dhe luftëra të armatosura për të minuar autoritetin dhe besueshmërinë demokratike, për të rrënuar të gjitha parametrat stabilizuese dhe paqen e fituar, për të ripërcaktuar kufijtë dhe imponuar rregulla të reja të rendit. Ne përfaqësuesit e forcave të qendrës së majtë në Evropë, e kujtojmë historinë dhe jemi larg të qenit naivë: Historia evropiane ka vërtetuar gjithmonë se ne jemi në ballë të luftës kundër të gjitha formave të ekstremizmave, për promovimin e paqes dhe të drejtave të njeriut edhe kur dhuna, racizmi, antisemitizmi dhe islamofobia duket se po fiton terren dhe mendje”, ka theksuar tutje Kurti.
Megjithatë, ai ka shprehur optimizmin e tij se duke forcuar unitetin do të mund të ndryshohet rrjedha e këtyre ngjarjeve.