Nesër është ditë e rëndësishme e cila mbase do ta determinojë fatin e dialogut mbi normalizimin e marrëdhënieve. Kosova dhe Serbia tani kanë një propozim të ri për të cilin duhet të deklarohen.
Korrespondentja e RTK-së nga Brukseli, Gjeraqina Tuhina, në lidhje të drejtpërdrejtë në “Lajmet e Qendrore”në RTK, deklaroi se dita e nesërme do të determinojë jo vetëm fatin e dialogut, por edhe fatin e raporteve të njërit shtet, apo të tjetrit me këto shtete kyçe evropiane.
“ Mos të harrojmë se është hera e parë që liderët kryesorë në Bashkimin Evropian, kancelari gjerman, presidenti francez dhe kryeministrja italiane e presin kryeministrin e Kosovës në njërën anë, ashtu edhe presidentin e Serbisë në anën tjetër”, tha ajo.
Tuhina tha se këtë herë pritjet janë të thjeshta. Po apo jo për planin i cili është dorëzuar më 21 tetor si në Prishtinë, ashtu edhe në Beograd.
“Mos të harrojmë se po flasim për liderë të cilët i kishin emisarët e tyre pjesë të pesëshes evropiane që vizitoi të shtunën e kaluar Prishtinën dhe Beogradin dhe që prezantoi planin e ri, ku edhe përfshihet siç thuhet një propozim modern evropian për themelimin e Asociacionit të Komunave me Shumicë Serbe në Kosovë”, tha ajo.
Këto dy takime do të jenë të shkurtra sepse janë liderët që merren edhe me çështje të tjera serioze, përfshirë edhe samitin dyditorë që nis në orën 15:00, andaj sipas Tuhinës edhe presin vetëm deklarime të qarta si nga Kosova dhe Serbia.
“Sa janë të përkushtuar, a do e pranojnë planin si të tillë, përfshirë edhe propozimin për Asociacion, ndërsa nga Serbia do të insistohet që të konfirmohet se do zbatohet e tërë marrëveshja për rrugën drejtë normalizimit të raporteve, sepse rikujtojmë se për shkak të Serbisë nuk është nënshkruar kjo marrëveshje, dhe Serbia në disa raste e ka demonstruar se nuk do e zbatojë secilën nga këto pika”, tha ajo.
Sipas korrespondentes së RTK-së, në këtë kontekst ndaj Beogradit do të jetë kjo lloj trysnie që të demonstrohet përkushtimi për zbatimin e mëtejshëm, ndërsa nga Prishtina do të kërkohet përkushtimi dhe konfirmimi se do të pranohet ky plan, përfshirë edhe piken që i referohet Asociacionit.
Korrespondentja Tuhina tha se edhe nëse nuk dihen detajet e këtij plani, megjithatë diplomatët atje sa i përket planit për Asociacion që quhet modern dhe evropian , thuhet që është oferta më e mirë që mund ta ketë Kosova ndonjëherë.
