Kryetarja e Grupit të Miqësisë Kosovë-Estoni i Kuvendit të Kosovës, Fitore Pacolli e ka pritur në takim kryetarin e Grupit të Miqësisë me Kosovën në Parlamentin e Estonisë, deputetin Kristo Enn Vaga.
Pas takimit, kryetari i Grupit të Miqësisë Estoni-Kosovë në Parlamentin e Estonisë, Kristo Enn Vaga ka thënë se shteti i tij po e përcjell me vëmendje situatën e sigurisë në Kosovës. Ai u ka bërë thirrje të dy shteteve që të punojnë për de-eskalimin e situatës.
“Sigurisht që ne diskutuam për situatën në Kosovë. Parlamenti i Estonisë me vëmendje e ka përcjell situatën. Kosova po punon, por edhe duhet që të punojë në de-eskalimin e situatës. I bëjmë thirrje Serbisë që të punojë në de-eskalimin e situatës që të gjendet një zgjidhje”, ka thënë ai.
Kristo Enn Vaga, ka garantuar mbështetjen e shtetit të tij në çdo hap për Kosovë. Ai ka deklaruar se do të punojë personalisht me vendet anëtare që të gjendet paqe në rajon.
Kryetarja e Grupit të Miqësisë Kosovë-Estoni në Kuvendin e Kosovës, Fitore Pacolli, ka thënë se në këtë takim është diskutuar edhe në lidhje me sulmin e 24 shtatorit në veri të Kosovës, ku sipas saj, Kosova e ka mbështetjen e plotë të shtetit të Estonisë.
“U përmend sulmi terrorist i cili u organizuar me 24 shtator, këtu e kemi mbështetjen e fortë të Estonisë sa i përket luftë tonë për demokraci dhe për paqen në rajon po ashtu sa i përket edhe të drejtësi së Kosovës për të marr pjesë në organizata ndërkombëtare si shtet më të drejta të plota, për të mos u bllokuar nga Serbia”, ka deklaruar ajo.
Sipas saj, Kosova e ka mbështetjen e pa rezervë të Estonisë për anëtarësim në Këshillin e Evropës sidomos dhe në anëtarësim në BE.
